रस्ता देतो

Posted by जयदीप on Sunday, 24 August 2014

दगडामध्ये थोडे पाणी असते
बाबामध्ये थोडी आई असते

तो लिहितो ते समजत नाही आता
अश्रू हल्ली त्याची शाई असते

रस्ता देतो ....त्याला अडवत नाही
ज्याला माझ्यापेक्षा घाई असते

स्वप्न तुझे मी पाहत असतो तेव्हा
झोप उगाचच माझी जागी असते

जीव अडकल्यावरती सोडत नाही
आठवणींची असली जाळी असते

.....जयदीप

गझल: 
गझल

प्रतिसाद

चित्तरंजन भट

सोम, 25/08/2014 - 19:05

वा. छान आहे गझल. सगळेच शेर आवडले. 'बाबामध्ये' >> ऐवजी 'बापामध्ये' वाचले.

अजय अनंत जोशी

सोम, 25/08/2014 - 20:17

दगडामध्ये थोडे पाणी असते
बाबामध्ये थोडी आई असते

फार छान शेर. . !

गझल आवडली .

जयदीप

मंगळ, 26/08/2014 - 10:46

मनापासून आभार सर...

:)

supriya.jadhav7

बुध, 27/08/2014 - 10:51

दगडामध्ये थोडे पाणी असते
बाबामध्ये थोडी आई असते........ 'बाप' शब्दप्रयोजनाबद्दल सहमत 'बाबा'च वापरायचा असेल तर 'बाबांमध्ये' जास्त रास्त ठरेल असे आपले एक वाटून गेले.

तो लिहितो ते समजत नाही आता
अश्रू हल्ली त्याची शाई असते......वा !

रस्ता देतो ....त्याला अडवत नाही
ज्याला माझ्यापेक्षा घाई असते....क्या बात ! फार आवडला हा शेर.

चुभूदेघे.

-सुप्रिया.

अनंत ढवळे

शुक्र, 29/08/2014 - 18:18

शेर आवडले, शुभेच्छा

जयदीप

शुक्र, 05/09/2014 - 10:18

मनापासून आभार....सुप्रिया जी , अनंत सर