नीट वाच...!

Posted by प्रदीप कुलकर्णी on Tuesday, 15 April 2014

कविवर्य सुरेश भट यांचा आज (15 एप्रिल) जन्मदिन.
त्यांना विनम्र आदरांजली.
................................................................

............................................
नीट वाच...!
............................................

ही निष्कर्षाची कशास इतकी घाई ?
वेड्यात मला काढून शहाणा जाई...

हा काळ निर्दयी नागवतो सगळ्यांना...
आयुष्य न देई कशाचीच भरपाई

मज मधून येते जाग उदास सुरांनी...
कोणास्तव गाते रात्र मुकी अंगाई ?

मी जुनेच, सारे जुने आठवत बसतो...
मज जुनेपणाची कशास ही नवलाई ?

अद्याप न माझा शोध संपला माझा...
मी गवसत नाही मलाच माझ्या ठाई !

अश्रूंची पोरे पुन्हा पोरकी झाली...
मौनात मुसमुसे आकाशाची आई!

लागेल नव्याने अर्थ पुन्हा एखादा...
तू नीट वाच मी शिंपडलेली शाई!

- प्रदीप कुलकर्णी
.................................................

गझल: 
गझल

प्रतिसाद

चित्तरंजन भट

बुध, 16/04/2014 - 14:35

ही निष्कर्षाची कशास इतकी घाई ?
वेड्यात मला काढून शहाणा जाई...
वाव्वा. मस्त मतला आहे. नवलाई, शाई...सगळेच शेर छान झाले आहेत.

प्रसाद लिमये

बुध, 16/04/2014 - 21:26

मतला, नवलाई सुरेख आहेत. शिंपडलेली शाई पुन्हा पुन्हा वाचावा असा

शुभानन चिंचकर

शुक्र, 09/05/2014 - 13:54

बरेच शेर छान झालेत

देवेंद्र गाडेकर

शुक्र, 09/05/2014 - 14:19

नवलाई आणि मतला जे बात

बेफिकीर

शुक्र, 09/05/2014 - 14:47

लागेल नव्याने अर्थ पुन्हा एखादा...
तू नीट वाच मी शिंपडलेली शाई!

Sundar sher aani sundar gazal.

supriya.jadhav7

रवि, 24/08/2014 - 17:30

ही निष्कर्षाची कशास इतकी घाई ?
वेड्यात मला काढून शहाणा जाई..... वा !

अद्याप न माझा शोध संपला माझा...
मी गवसत नाही मलाच माझ्या ठाई !.....क्या बात !

लागेल नव्याने अर्थ पुन्हा एखादा...
तू नीट वाच मी शिंपडलेली शाई!........क्या केहेने !