आसवे

आज नयनी पुन्हा जागली आसवे
भंगली शांतता वाजली आसवे

लोक जातात नयनांवरी कोरड्या
हाय दिसती कुठे आतली आसवे

तू जरी धाडले शुद्ध हासू मला
पोचता पोचता जाहली आसवे

आठवांच्या तुझ्या या वरातीमधे
वेदना प्राशुनी नाचली आसवे

जाहलो मी अता आसवांची कबर
मी मला खोडुनी गाडली आसवे

ही गझलही नसे ही नसे गीतही
फक्त मी तुजपुढे ढाळली आसवे

Taxonomy upgrade extras: 
गझल

प्रतिसाद

अजय अनंत जोशी

शुक्र, 07/11/2008 - 10:29

आठवांच्या तुझ्या या वरातीमधेवेदना प्राशुनी नाचली आसवे
कलोअ चूभूद्याघ्या

deepak angewar

शनि, 15/08/2009 - 18:07

अप्रतिम

अनिल रत्नाकर

गुरु, 14/01/2010 - 00:21

वाजली आसवे आणि गाडली आसवे जबरदस्त कल्पना.

वैभव देशमुख

गुरु, 14/01/2010 - 16:01

प्रतिसादाबद्दल धन्यवाद.....

बेफिकीर

गुरु, 14/01/2010 - 23:26

तिसरा शेर आवडला. मतल्यातील दोन ओळींचे कनेक्शन लक्षात आले नाही. याही गझलेत 'कबर' आली आहे. बाकीचे शेर सरळ वाटले. माफ करा.

अर्चना लाळे

शुक्र, 15/01/2010 - 11:14

ही गझल विशवस्तांनी लिहिली आहे का?
ही गझलही नसे ही नसे गीतही
फक्त मी तुजपुढे ढाळली आसवे
हे छान.

विश्वस्त

शुक्र, 15/01/2010 - 15:45

काही तांत्रिक कारणांमुळे वैभव देशमुख ह्यांचे नाव दिसत नाही आहे.