जटायू

Posted by पुलस्ति on Wednesday, 2 April 2008

का पुन्हा खोटे हसावे वाटते?
चेहर्‍यामागे लपावे वाटते...

कोणते ओझे उरी मी वाहतो
मोकळे व्हावे, रडावे वाटते!

चार दाणे आज कोणी टाकले
पाखरांना किलबिलावे वाटते

नेहमी नाकापुढे तो चालतो
नेहमी त्याला वळावे वाटते!

प्रश्न माझा वाल्मिकीला एवढा -
का जटायूला लढावे वाटते?

काय त्याचा दोष? कसली ही सजा?
...काय त्यालाही जगावे वाटते?

तोच मी अन त्याच या संवेदना
का नवी कविता लिहावे वाटते?

हे असावे ते नसावे वाटते
यात का आयुष्य जावे वाटते?

जाणतो होणार नाही जे कधी
ते अचानक आज व्हावे वाटते...


गझल: 
गझल

प्रतिसाद

चित्तरंजन भट

बुध, 02/04/2008 - 10:59

कोणते ओझे उरी मी वाहतो?
मोकळे व्हावे, रडावे वाटते!
वाव्वा
चार दाणे आज कोणी टाकले?
पाखरांना किलबिलावे वाटते
वाव्वावा...
वरील दोन शेर अतिशय आवडले.  मस्त!! (तसे सगळेच शेर अगदी  समृद्ध आहेत.) अभिनंदन आणि शुभेच्छा!!!

नचिकेत

बुध, 02/04/2008 - 11:39

.... म्हणायचे आहे. मस्त!!!

केदार पाटणकर

बुध, 02/04/2008 - 14:05

पुलस्ति,

कोणते ओझे उरी मी वाहतो
मोकळे व्हावे, रडावे वाटते!
नेहमी नाकापुढे तो चालतो
नेहमी त्याला वळावे वाटते!
तोच मी अन त्याच या संवेदना
का नवी कविता लिहावे वाटते?

....आवडले.
छान गझल.

परखड

शुक्र, 04/04/2008 - 19:53

पहिले चार शेर छान आहेत. इतर शेरांवर माझा शेरा:  शेरासाठी शेर (शेर बराए शेर) टाळा किंवा जे सांगायचे आहे ते भक्कमपणे सांगा. 

अनंत ढवळे

शनि, 05/04/2008 - 18:00

कोणते ओझे उरी मी वाहतो
मोकळे व्हावे, रडावे वाटते!
 
 
सुंदर शेर...

 

नीता

शनि, 25/04/2009 - 13:43

ही पूर्ण गझल खूपच सुंदर आहे. 'कोणते ओझे उरी मी वाहतो' आणि 'नेहमी नाकापुढे तो चालतो' हे दोन्ही शेर घुसमट छान दाखवतात.

प्रसन्न शेंबेकर

गुरु, 30/04/2009 - 11:43

कोणते ओझे उरी मी वाहतो
मोकळे व्हावे, रडावे वाटते!

प्रत्येकाचीच खंत. . .

प्रसन्न शेंबेकर
"तुझी जागण्याची अदा पाहिली
फुले आरतीला उभी राहिली"

चांदणी लाड.

मंगळ, 12/05/2009 - 16:39

गझल आवडलीच त्यातही हे शेर फार आवडले.
 
कोणते ओझे उरी मी वाहतो
मोकळे व्हावे, रडावे वाटते!
तोच मी अन त्याच या संवेदना
का नवी कविता लिहावे वाटते?
हे असावे ते नसावे वाटते
यात का आयुष्य जावे वाटते?
 

क्रान्ति

बुध, 13/05/2009 - 00:04

गझल आवडली.