आपला फासा न यावा आपल्यावर...

Posted by अजय अनंत जोशी on Friday, 5 February 2010

कोणती धुंदी चढावी काळजावर ?
ना तसे काळीज उरले धुंदल्यावर..

लढ जसे तू पाहिजे पण काळजी घे..
आपला फासा न यावा... आपल्यावर

'सांगणे त्याने घराणे बंद केले...'
स्वप्न ही पडतात हल्ली जागल्यावर

बोल तूही जे जसे बोलायचे ते
काय कामाची प्रसिद्धी...? झाकल्यावर?

आपले संबंध इतके मोकळे की,
मोकळे वाटून गेले तोडल्यावर...

'ही निघाले..' बोलते आहेस नुसते...
कोण येथे भाळले आहे तुझ्यावर ?

कोणती झाली न शिक्षा आजही अन्
काढले खटले निकाली शेकड्यावर..

बोलते आहेस आता, 'काय झाले?'
घाव इतके घालुनी माझ्या मनावर..

'ठेवले नाते अजूनी... जोडलेले..'
कोणते उपकार केले आमच्यावर..?

गझल: 
गझल

प्रतिसाद

अजय अनंत जोशी

सोम, 08/02/2010 - 08:56

आणखी एक घ्या....

आशयाची धार केंव्हाचीच गेली
राहिलो गुंतून मात्रा मोजण्यावर....

काफिया फार सोपा आहे. प्रत्येक जण लिहू शकेल........... लिहा :)

ज्ञानेश.

सोम, 08/02/2010 - 19:23

आपले संबंध इतके मोकळे की,
मोकळे वाटून गेले तोडल्यावर...

हा शेर मध्यभागी शोभून दिसतो आहे ! :)

प्रताप

मंगळ, 09/02/2010 - 09:34

खुप आवडली. खटले आवडले.

बेफिकीर

मंगळ, 09/02/2010 - 18:30

'सांगणे त्याने घराणे बंद केले...'
स्वप्न ही पडतात हल्ली जागल्यावर - समजला नाही. माफ करा.

बोल तूही जे जसे बोलायचे ते
काय कामाची प्रसिद्धी...? झाकल्यावर? - छान!

आपले संबंध इतके मोकळे की,
मोकळे वाटून गेले तोडल्यावर... - चांगला शेर! (वाटले किती भकास वाटले बरे किती आठवला.)

'ही निघाले..' बोलते आहेस नुसते...
कोण येथे भाळले आहे तुझ्यावर ? - चांगला शेर!

धन्यवाद!

अजय अनंत जोशी

मंगळ, 09/02/2010 - 22:40

ज्ञानेश, प्रताप, बेफिकीर धन्यवाद!

जयश्री अंबासकर

बुध, 10/02/2010 - 12:16

छान !
मोकळे संबंध मस्तच !!

चित्तरंजन भट

बुध, 10/02/2010 - 22:36

छान. मोकळा शेर चांगला आहे.

गंगाधर मुटे

बुध, 17/02/2010 - 21:48

आपले संबंध इतके मोकळे की,
मोकळे वाटून गेले तोडल्यावर...
खुप आवडला.

अजय अनंत जोशी

शनि, 20/02/2010 - 07:58

जयश्रीताई, चित्तरंजनजी, गंगाधरजी धन्यवाद!
मोकळा शेर तसा सर्वांनाच आवडलेला दिसतोय! अर्थात तो लिहिल्यावर मलाही थोडे मोकळे वाटले होते म्हणा..:)