मन्मना...!

कधी जाणता.. अजाणता तुलाच होती यातना,

मन्मना..मन्मना,समजून घे रे जीवना...//ध्रु//

चेहर्‍यांच्या सागरात मन चेहरा तोच शोधीते,

निष्पाप एका चेहर्‍यावर सर्वस्व वेडे जुंपीते...

पट तोच डाव नवा प्राक्तनाशी सामना...//१//

स्मरती अनेक वचने दिली ओल्या पापण्यांनी,

सारून काटे मागे वार केले पाकळ्यांनी...

जखमा पुन्हा नव्याने साद देती या मना.....//२//

नकळत मेघ किती आकाशात वर्षिले,

हरवून अस्तित्व माझे अद्रुश्याला स्पर्शिले...

प्रत्येक क्षणास केली आसवांची याचना.....//३//

तरी मन नदीसम खळाळून वाहते,

विसरून अक्षम्य सारे तुझीच वाट पाहते...

स्थिर गूढ डोहात अव्यक्त खोल भावना.....//४//